我哋MISTAMP嘅創辦人Samuel早前接受叱咤903《知薰E》節目主持朱薰小姐嘅訪問，訪問內容已經喺6月6號至6月10號一連五日喺《知薰E》入面嘅〈專家話〉環節播出。下面唔單只可以重溫返五日嘅訪問內容，亦都可以睇埋Samuel喺訪問之後嘅回顧。
訪問重溫
訪問回顧
問題1︰
點解《知薰E》節目主持朱薰小姐會搵Samuel你做節目入面〈專家話〉環節嘅訪問嘉賓嘅呢？
Samuel答︰
其實真係好講緣份。之前同朱薰小姐因為公事合作過，所以識到佢，最近咁啱同佢傾到MISTAMP嘅最新發展。佢就話︰「其實我個節目有個〈專家話〉嘅環節，每個星期都會邀請某一方面嘅專家做個訪問，既然你係電子印花嘅專家，咁不如你上我節目做個訪問，介紹下你隻APP啦！」結果隔咗冇幾日我就已經去咗商台到做訪問啦！
問題2︰
《知薰E》訪問出街之後有冇咩回響呀？會唔會多咗人註冊做MISTAMP用戶，或者有冇多咗商戶查詢合作㗎？
Samuel答︰
呢度都好想多謝返朱薰小姐先。節目出街之後好快就已經有好幾個商戶主動搵我哋查詢返MISTAMP或者電子印花嘅嘢，仲有唔少新用戶係咁啱喺節目播放期間註冊成為MISTAMP用戶嘅，可能就係一邊聽住節目，一邊喺手機下載MISTAMP嘅，呢度都可以見到朱薰小姐嘅節目有幾受歡迎啦！
問題3︰
喺《知薰E》訪問入面，你對邊條問題印象最深刻呢？
Samuel答︰
嗯，應該係問推廣MISTAMP嘅時候遇上咩困難嗰題。我哋一直都好希望介紹MISTAMP比更加多嘅人認識，得到市場同香港人嘅認同，過程中都行過唔少彎路，遇上唔少挫折，吸取唔少教訓，嗰條問題令我諗返一路走嚟有幾咁唔容易。
問題4︰
有冇啲咩係你喺《知薰E》訪問入面冇講到，依家想補充返㗎？
Samuel答︰
有一點都想補充返。其實MISTAMP如果有更多商戶同顧客使用嘅話，本身幫襯唔同類型商戶嘅顧客就會因為MISTAMP嘅平台而互相引流，舉例嚟講，本身幫襯一間手搖飲品店嘅客人，可能會喺打開MISTAMP儲印花嘅時候，留意到一間食材鋪嘅優惠，咁就有助食材鋪吸引到新嘅顧客。
另一方面，如果有更多商戶通過MISTAMP推出電子印花優惠嘅話，咁消費者亦都可以發掘同享受到更多啱心水嘅優惠啦。
問題5
跟住落嚟，你對MISTAMP有咩期望或者展望呀？
Samuel答︰
嚟緊我哋想MISTAMP繼續開發出更多嘅新功能，令到MISTAMP可以為商戶同顧客提供更多嘅價值同便利。我哋亦都希望MISTAMP可以衝出香港，將儲印花嘅文化帶到去世界各地。尤其係近年嚟多咗香港人移民外地，我哋都會諗呢個會唔會係MISTAMP喺海外發展嘅契機呢？
例如我哋依家都有同投資者傾緊喺英國發展MISTAMP英國版嘅可能性，我好期待將來世界各地都有人會用MISTAMP嚟儲印花，我諗咁樣應該會好有趣！
